Like FATHER LIKE SON
3400KM FROM HONG KONG TO BEIJING
由細到大，我同老豆其實唔係特別親近，好多時都係各有各忙，傾計都唔多。好似唔少父子關係都存在嘅溝通不良問題，係我地身上都無可避免地發生。
但好彩，老豆係一個玩車之人——車，成為咗我哋父子唯一嘅共同語言。冇咩嘢可以拉近我哋距離，唯有一齊講車、玩車。車就係我同老豆聯繫感情嘅橋樑。
原來老豆當年都勁！
佢喺香港黃金年代，參加過被譽為史上最唔平凡嘅拉力賽——“港京拉力賽（Hong Kong Beijing Rally）”。呢個賽事由85年開始，87年停辦，93年再復辦，直到96年九七回歸前夕。
當年可謂係頂級國際賽事，吸引咗世界頂尖車手，連Colin Mcrea、Richard Burns、Eriksson Kenneth、篠塚建次郎都嚟參賽。香港藝人如成奎安、錢嘉樂都曾經參加過，絕對係星光熠熠。
今年適逢港京拉力賽40周年，有個致敬活動，我就諗：「不如試下行返老豆當年嘅路啦！」膽粗粗報咗名，仲叫埋老豆一齊去添。
雖然我都係FIA認可車手，但始終老豆係老豆——O C Food（老屎忽）上身，全程喺隔離口噏噏，嘈到我頭都大埋。
六日旅程，車未必係最快，但父子鬥嘴肯定冇停過！
雖然日日都嗌交，但行到終點發現原來有啲感情，係要咁樣鬧下鬧下先可以記一世。
今次父子檔，一齊行返呢條路，算係彌補咗啲遺憾。
三十年前後，父子一齊參加港京拉力賽，真係難能可貴。下年我踏入不惑之年，老豆都退休，有啲嘢真係唔等人。
細個嗰陣係我目送老豆係香港出發去賽車，今時今日，變咗佢企喺終點等我過線。角色調轉，但感情反而更實在。
人生得一次父子檔Once in a lifetime
呢啲經歷意義非凡。
Shop the Hot Rod Collection
ROAD
